INTANGHAI THUOISUOK AN NIH

Intanghai hung tlunghlim. Hmarkhawlien

HMARKHAWLIEN, July 3: Hebrai Veng, Hmarkhawlien laia motor in Esther Lalramfel (6) a chilhlumna le inzawma khawsung mipui le police hai kara buoina suoka intang mi 20 lai hin Enau Singh chu a hrana bail move a ni leiin thuoisuok ala ni hri naw a, mi 19 hai chu an intangna Central Jail, Silchar a’nthawk thuoisuok an lo ni tah.

June 2 zana police in an man, intanghai thuoisuok ding hin Peace Monitoring Committee hmalaknain motor (four wheeler) pali tir an ni a. Hmarkhawlien Junction lai intanghai hi mipuiin an lo hmuok a nih.

Peace Monitoring Committee anthawka chanchin dawng dan chun khawsung buoina leia intanghai hai hi parthi le ropui taka lo hmuok dinga insingsatna nei a ni a. Amiruokchu bail-a suokphalna hmu a ni hnung hin jail-a um zing a rem ta naw a. A zan a zana thuoisuok an ni ta a nih.

An intangna hmuna inthawk zan dar 9 khan an hung suok tan a. Diger khaw mipui khawmin an lo hmuok a. Zan dar 11:45 pm ah Hmarkhawlien hung tlungin Khawsung buoina leia intanghai chu thei ang tawka lo lawmlutna hun siem a ni a, Pastor Zahninglo in thuhmahruoi hrilna neiin Rev. E Lallawmlien in tawngtaina hun a hmang a, thingpui ruoi kilzui a nih.

Pu Abraham L Keivom, Chairman; PMC in THT a hrilna chun tuta intanghai suokna hi a hmahruoi ang chau a la ni a, buoina leia mani in le lo suksieta um hai khawm an hmatienga bawzui a ni ding thu a hril. A hrilpeina chun, “Thuneituhai anthawk Cachar SP chu PMC le compromise nei dinga inhriettirna pek a ni a. Final Report pe’ng ei ta. Tuta case fe mek hi vawikhata suktawp ei tum a nih,” tin a hril.

1 Comment on "INTANGHAI THUOISUOK AN NIH"

  1. Atha khop el

Leave a comment

Your email address will not be published.


*