Lalmuanpuia Vanchhong Pasaṭha tlanmuola vuiliem

HMARKHAWLIEN, June 29: Silchar Medical Hospital-a mithiruong siena (morque) sunga um Lalmuanpuia Vanchhong, Hmuia Veng, Churachandpur chu Hmarkhawlien Val-Upa hmalaknain lakdawk a ni a. June 29 dar zar 6 khan Pasaltha tlanmuol, Hmarkhawlien ah vuiliem a lo ni tah. Morque a um ruong Lalmuanpuia ruong hi June 28 khan a ladawk dingin Hmarkhawlien tlangval an inthawk dawk a. Silchar an tlung huna morque a lo inkhar tak leiin ruong hi la dawk theil lovin an um a. A zing, June 29 khan inthawk tha nawkin ambulance le mahendra pick-up pakhat sip murin Hmarkhawlien tlangval hai an inthawk nawk. Chanchin laknain a hril dan chun Hmarkhawlien tlangvalhaiin ruong laksuok tawm hin Manipur Police haiin lakdawk an lo tum ve a. Ruong inchuna a tlung ta a nih.
Lalmuanpuia ruong lakdawk tuma inchu Hmarkhawlien tlangval le Manipur Police hai kara inhnielna hun iemani chen an nei hnungin Hmarkhawlien tlangvalhai chun, “Mithiruong hin Hmarkhawlien pel naw nih,” tia thang an khaw hnung chun Manipur Police haiin an inchu sap ta chuong naw a, ruong chu an chang lem ta tho tho a nih.

          Ruong hi Hmarkhawlien khawsung lutpui a ni hnung hin tinhmun a inthawka missionveng panna Leilak-ah hunser tawite hmang a ni a. Hmar Inpui, Barak Valley Region le Barak Valley Hill Tribes Development Council hmingin thangsuopuon inkhumna Lalmuanpuia Vanchhong a ruong hi nei a ni a. Pasaltha tlanmuol-a Rev. Emmanuel Ralsun PCI in inthlana a nei a. Mithi sunghai ta dinga tawngtaipekna a nei a. Hieng ang inthatna le tuia inlennahai hi Hmar hnam sunga tlung nawk ta ngai nawna dingin Pathien kuoma ngenna a nei bawk a nih.
Hmarkhawlien Val-Upa Assistant Secretary Pu Thara in The Hmar Times a hrilna chun ruong inhlawmna le inzawma tlawmngaia sin thawtuhai po po chunga lawmum a ti thu a hril sa bawk a nih.

 

Be the first to comment on "Lalmuanpuia Vanchhong Pasaṭha tlanmuola vuiliem"

Leave a comment

Your email address will not be published.


*