Pu Lalringum Sanate, Jubo Darpan-in Award a’n hlan

Silchar, Oct 29 — Bengali Weekly Newspaper ‘Jubo Darpan’ chun Pu Lalringum Sanate, Inspector of Excise, Silchar Sadar chu ‘Vantlang siemthatna thila a challangna’ le inzawmin vawizan dar 7:30 PM khan Rajiv Bhawan, Silchar-ah Chawimawina Award a’n hlan.

Assam state sunga sorkar thawktu, sin thaw tha hai kuomah hieng ang chawimawina Award hi kumtin Jubo Darpan hin an hlan hlak-a. Police, Excise, Education, Traffic, Health le department hran hrana sinthaw tha bik hai thlangsuokin, Award hi a’n hlan hlak a nih.

Award inhlanna programme hi Dilip Paul, Deputy Speaker, Assam Legislative Assembly le Hon’ble MLA, Kishore Nath haiin an uopmawi-a. Rajiv Bhawan-Conference Hall chu mipui an sip mur bawk-a. Hlasak, lam le hmunuomum thil chi hran hran inentirna nei a ni bawk a nih.

Hmar nau history a ding chun hieng ang chawimawina dawng ei um hi a vawikhatna a ni-a. Pu Lalringum Sanate hi Assam Public Civil Service Commission (APSC) fethlengin 2010 khan Excise Department, Assam-ah a lut-a. Patharkandi, Guwahati le Masimpur-ah hai posting le inzawmin a lo khawsa ta bawk hlak. 2015 khan Silchar-ah hung lutin a chengna Hmarkhawlien a’nthawk an saiinsang hlak a nih.

Hieng ang chawimawina Barak Valley sunga cheng Hmar nau haiin ei hang dawng hi lawmpui a um hle-a. Hriselin dam vawng vawng sienla, chawimawina ditum lem dawng pei mawl raw seh!

Be the first to comment on "Pu Lalringum Sanate, Jubo Darpan-in Award a’n hlan"

Leave a comment

Your email address will not be published.


*