THT DATED 21 JUNE 2017, A Pu. L.THANMAWI PAJAMTE THUZIEK, NEHRU COLLEGE, PAILAPOOL BIK A THUDIK LEM.

By: Lalremhriet Hmar Hmarkhawlien

A hmasan thuziek mi ka ni nawh a, ṭawngkam themthiem tak khawm ka ni chuong lem nawh. Sienkhawm, thudik ka tarlangnaw chun mipui THT tiemtu hai po povin thudik inhrietnaw el ding chu thilṭha nin ka hrietnaw leiin thudik lem hung thailang ka tum cho anih. A thuziek ka sawisel nuom reng reng leia ziek khawm ka ni chuong nawh. Mani
mawnghlim ding ang nilang khawm thudik hril hi mitinin ei thaw ding reng ani angin thudik ka hung hril el ding anih.

Pu. L.Thanmawi Pajamte (Adviser, HLS,Asaam) a thuziek ‘MIL (HMAR) INCHUKTIRTU A BANG’ ṭhenli (para 4)na a khan Nehru college fund-a inthawk thlatin Rs. 3000/- Hmar MIL Lecturer hlaw pe dingin Principal le Hmar Literature Society hai inberem angin a hung zieka, sienkhawm ka thawk ṭantir tarik ni 01-09-2014 a inthawk  awisunni chen hin no work no pay’ ang char charin an mi sawrha, session khat sung hin thlali bak class a um ngai si nawh a, kumkhat sungin thlali chie thlahlaw ka hmuh tina ni chuh. Kumkhat sungin thlali char bu fa ta ang inla hawm chu hme boin, adam khawsuok ei vang awm?? Kawngkhat ngaituo chun inzak khawm a um, thlasiet
khawm a um bawk, milaia hlawzat indawnlem chu lubura sie chi khawm nilo anih. ka sunghai hin “iengkhawm  hawdawk i nei nawh bu thleng awt ve naw rawh” mi ti hai sienlakhawm, hril ding ka neinaw reng reng ‘ui hmur  vuok’ ang tho ding ka nih. Dawn a sei, ieng chen tak am fak le dawn ding boin ka Hnam, Ka Nu Tawng, Ka piengna ram hi hmangai thei ka ta ?? Hmar MIL latu le asawrtu sikul naupanghai hlaka a hringzing theina ding le hma asawn theina dingin thanglak ei tum si naw chun, tunam hma la tang an ta ?? Ei thu hril tak ei maksan hla taluo hmain, ei thupuia kir nawk tang ei tiu. Nehru college Principal le HLS, haiin thlatin Rs.3000/- dinga an loin biekrem ani chun ngaiven that ava ṭha awm de,tuta hlaw inpek dan leh an ang ta si naw a. Iengpo khawm nisien Nehru college a ding chun Hmar MIL einei a inthawkin nasa takin hma ei sawn a. kum 2014 a inthawkin Hmar students hai ringsanin Advance Christmas kan hmang tan a, HSA NC hmalaknain kum 2016 a inthawkin college megazine ah Hmar section
ei nei ṭan a, HSA NC hai suong an um tak zet. kum tinin Hmar subject a letter marks hmu an um zie bawk. Ei Hmar subject leiin percentage insang tak tak ei hmu pha bawk a, awzemi tam tak haiin an min hnar a, a bo nawk el ding chu phal lul naw mai niu. Abo ta chun ṭhangthum liem hnunga khawm nei thei nawk ta kher naw mai nih. Assam  amah hin voter list a ei um bak hi chu hmun le hmang reng ei nei nawh. E ṭawng a um sung chu, ei hnam hi a damin
a hring zing ding anih,khawvel ahin tawng neilo hnam an um ngai nawh. Chuleiin nu le pa, inchuklaihai ei theina  awn sengah thang lang ei tiu le. Hnam hmangaitu hai hung suok ro le kumhlun thil ding, thang la hung tharpei hai sawr thei ding ngaituong ei tiu le…

Be the first to comment on "THT DATED 21 JUNE 2017, A Pu. L.THANMAWI PAJAMTE THUZIEK, NEHRU COLLEGE, PAILAPOOL BIK A THUDIK LEM."

Leave a comment

Your email address will not be published.


*